እንኳን ለጌታችን ለመድኃኒታችን ለኢየሱስ ክርስቶስ የዕርገት በዓል አደረሳችሁ!!!

በስመ አብ ወወልድ ወመንፈስ ቅዱስ አሐዱ አምላክ አሜን!

“እያዩት ወደሰማይ ዐረገ” (ሉቃ 24÷50 የሐዋ 1÷9)

ዕርገት

ጌታችን አምላካችን መድኃኒታችን ኢየሱስ ክርስቶስ ሞትን በሞቱ ድል ነሥቶ
የትንሣኤያችን በኩር የሆነው ጌታ በመቃብሩ ቦታ
– ለማርያም መቅደላዊት እና ለሌሎችም ሴቶች (ማቴ 28÷1 የሐዋ 2÷1)።
– ለኤማውስ መንገደኞች (ሉቃ 24÷13)
– ለደቀማዛሙርቱ በተዘጋ ቤት (ዮሐ 20÷8)
– በጥብርያዶስ ባህር ለደቀመዛሙርቱ ዮሐ 21÷4
ሥርዓትን እያስተማረ አልፎ አልፎም በግልጥ እየታየ ፍርሐታቸውን እያስወገደ አይሑድ እንደሚሉት ሥጋውንም ደቀመዛሙርቱ እንዳልሰረቁት ይልቁንም በሞት ላይ ሥልጣንኑን አሳይቶ መቃብሩን ባዶ አድርጐ በትንሣኤው አለት ላይ ያቆመን፣ ሞት በእርሱ እንደተሸነፈ የማይታየው እየታየ፣ ዘመን የማይቆጠርለት፣ ዘላለማዊ ጌታ የማይዳሰሰው እየተዳሰሰ ለ40 ቀናት ያኽል ቆይቶ ተከታዮቹን ሐዋርያትን ወደ ቢታንያ አወጣቸው። እያዩት በምስጋና ወደሰማይ ዐረገ። እንዲህ ተብሎ በነብዩ ዳዊት እንደተፃፈው፡- “ዐረገ እግዚአብሔር በይባቤ ወእግዚእነ በቃለ ቀርን ዘምሩ ለአምላክነ ዘምሩ” እግዚአብሔር በመለከት ድምጽ ዐረገ፣ ዘምሩ ለአምላካችን ዘምሩ፣ ዘምሩ ለንጉሣችን ዘምሩ (መዝ 46÷5)

አምላካችን ወደ ሰማይ ከማረጉ በፊት ለደቀመዛሙርቱ የገባላቸው ቃልኪዳን፡

1. ምስክሮቼ ትሆናላችሁ፡፡ (ሉቃ 24÷48) ደቀመዛሙርቱ ያዩትንና የሰሙትን ሞትን አሸንፎ የተነሣውን ጌታ ለዓለም ሁሉ ምስክሮች ሆነዋል። በሕይወት ዘመናቸው ሁሉ የዓላውያንን ነገሥታት፣ የቄሳሮችን ዛቻና ማስፈራሪያ አንዳችም ሳይፈሩ ከምድር ዳርቻ እስከምድር ዳርቻ ድረስ ሁሉን እያጡና መከራ እየተቀበሉ፣ እየታሰሩና እየተገረፉ ምስክሮች ሆነዋል። ኢየሱስ ክርስቶስ ከዚህ በኋላ ስሙን አትጥሩና በስሙም አታስተምሩ እያሏቸው በሸንጐ ፊት ሲያቆሟቸው፣ ሲገርፏቸው ደስ እያላቸው ከሸንጐ ፊት ይወጡ ነበር፡፡ (የሐዋ 5÷40)። ስለ ስሙ ምስክር መሆን መነቀፍና መታሰር፣ መደብደብ እንዴት ደስ ይላል!። እኛም እንደ ደቀመዛሙርቱ ማንንም ሳንፈራ አፋችንን ሞልተን ስለ ስሙ እየመሰከርን ሁሉን ብናጣም ሞታችንን በሞቱ ድል የነሣልንን የሚቃወመንን ጠላታችንን በመስቀል ላይ ተሰቅሎ ያስወገደልንን፣ እረፍትና ሰላም የሰጠንን፣ ጨለማውን ገፎ ብርሐንን ያጐናፀፈንን፣ ያለፈውን ታሪካችንን በነበር ላስቀረልን ምስክሮች እንሁን።

2. አጽናኙን እልክላችኋለሁ (ዮሐ 15÷26)፡-
– በአህዛብና በዓላውያን ነገሥታት ፊት ሲቆሙ እውነትን እንዲናገሩ የሚያፅናና ኃይል፣
– ከተዘጋ ቤት ወደ ሠገነት እንዲቆሙ የሚያደርግ ኃይል፣
– ልበ ሙሉ ሆነው ከጥርጥር ወደ ፍፁም እምነት፣ ከፍርሃት ወደ ድፍረት እንዲሸጋገሩ የሚያበረታታ አጽናኝ ኃይል እልክላችኋለሁ።
ይህ ኃይል በዘመናችን በጣም ስለሚያስፈልገን በፍፁም መዘንጋት የለብንም፡፡ እውነትን ለመናገርና ለመመስከር፣ ፍርሐታችን እንዲወገድልን ከፈለግን ይህንን ኃይል ዓለም ሳይሆን የሚሰጠን ኢየሱስ ክርስቶስ ብቻ መሆኑን አውቀን ጌታ ሆይ እኔን ልጅህ ያንተን ኃይል አጥቼ ደክሜያለሁ፣ ከእኔ የሆነ ኃይል ምንም የለምና ከእኔ አትራቅ።
– ባስልኤልንና ኤልያብን በጥበብ መንፈስ የሞላህ (ዘፀ36÷2)
– ሶምሶንን በጾርዓና በኤሽታኦል ያነቃቃህ (መሳ 14÷18)
– ለደቀመዛሙርቱ ኃይልህን ልከህ 71 ቋንቋ የገለጥክ፣ በየዘመናቱ የተመረጡ አገልጋዮችህ ያፅናናህ፣ የእውነትን ቃል እየላክ ያበረታታህ እኛም እንድንበረታ ኃይልህን ከአርያም ላክልን፣

3. በኢየሩሳሌም ቆዩ ኃይልም ታገኛላችሁ (ሉቃ 24÷49)፡- ደቀመዛሙርቱ ከቢታንያ ወደ
ኢየሩሳሌም ተመልሰው በአንድ ልብ ሆነው በኢየሩሳሌም ቀዩ። በመቆየታቸውም
ሰማያዊ ኃይል አገኙ።

እኛ ሰማያዊ ኃይል ለማግኘት የት እንቆይ?

በአንድ ልብ ሆነን በቤታችን፣ በአገልግሎታችን፣ በዘር፣ በጐሣ ሳንከፋፈል ይኸ እንዲህ ነው፣ ያ ደግሞ እንዲያ ነው፣ ሳንል ከኢየሩሳሌም ቤተክርስቲያን ሳንወጣ የወጣንም ተመልሰን በኅብረት ሆነን መቆየት ያስፈልገናል።
ሰዎች ባይመቹንም፣ ክፉዎች ልባችንንን ቢያቆስሉንም፣ ሰዎች እንጂ ያልተመቹን ክርስቶስና ቤተክርስቲያን አይደሉም። ስለዚህም ከኢየሩሳሌም ቤተክርስቲያን አንውጣ። ቅዱስ ሥጋውንና ክቡር ደሙን እየበላንና እየጠጣን፣ እያገለገልን ከእግዚአብሔር አባታችን እቅፍ ከቤተክርስቲያን እንቆይ፡፡ያደግንባት የእኛ ኢየሩሳሌም ቤተክርስቲያናችን ብናዝን የምንጽናናባት፣ አእምሮአችን የሚያርፍባት፣ ሰላም የምናገኝባት ከእግዚአብሔር የምንገናኝባት ቤታችን ናት።

ማጠቃለያ

አምላካችን የማዳን ሥራውን ካጠናቀቀ በኋላ ለተከታዮቹ ደቀመዛሙርት ምስክሮቼ ናችሁ። አጽናኙን እልክላችኋለሁ። “አንትሙ ንበሩ በሀገረ ኢየሩሳሌም እስከ ትለብሱ ሃይለ እማርያም፡፡ ኃይልን እስክትለብሱ ድረስ በኢየሩሳሌም ከተማ ቆዩ” ብሎ አዘዛቸው።

በመጨረሻም ወደሰማይ ሲያርግ እጆችንም አንስቶ ባረካቸው። (ሉቃ 24÷51)
በብሉይ ኪዳን ተፅፎ እንደምናገኘው፡- አባታችን አብርሃምን ባርኮ ያበዛ (ዘፍ12÷1)፣ ያዕቆብን በያቦቅ ወንዝ ሲባርክ ያደረ (ዘፍ35÷9)፣ ያቤጽን ባርኮ ሀገሩን ያሰፋ(1ኛ ዜና 4÷9)፣ አምስቱን እንጀራ፣ ሁለቱን ዓሣ አብዝቶ የባረከ ጌታ ዛሬም በኑሯችን አብዝቶ የሚባርከን፣ ሥራችንን እንድንሠራ በበረከት ያጣነውን ደስታ የሚመልስልን፣ ባርኮ በረከትን ወደሚያትረፈርፍልን፣ ጉድለትን ሳይሆን ሙላትን፣ ማጣት ሳይሆን በረከትን ወደሚሰጠን፣ ዓይኖቻቸውንም ወደ ላይ ትኩር ብለው እንደተመለከቱት እንደ ሐዋርያት ማየት ይጠበቅብናል። እውነት ነው እርሱን ማየት ከሁሉም ይበልጣልና ወደሰማይ ያረገውን ጌታ አይናችንን አንስተን እንይ።

ስብሐት ለእግዚአብሔር
ወለወላዲቱ ድንግል
ወለመስቀሉ ክቡር
አሜን።

ምንጭ፡- ከኢትዮጽያ ኦርቶዶስ ተዋህዶ ቤተክርስትያን ቅዱሳት መጻህፍቶች እና ስብከቶች የተውጣጣ
በመካነ ሕይወት መድኃኔአለም ቤተ/ክ የፈለገ ሕይወት ሰንበት ት/ቤ የተዘጋጀ
አድራሻ፦ 2715 22nd st NE Washington, DC 20018

በስመ አብ ወወልድ ወመንፈስ ቅዱስ አሐዱ አምላክ አሜን።

*** ዕለተ ሆሣዕና ***

“እነሆ ንጉሥሽ ጻድቅና አዳኝ ነው፤ ትሑትም ሆኖ በአህያም፣ በአህያዪቱ ግልገል በውርንጫዪቱ ላይ ተቀምጦ ወደ አንቺ ይመጣል።” ት. ዘካ. 9፥9

የዐቢይ ጾም ስምንተኛውና የመጨረሻው ሳምንት ሆሣዕና ይባላል። ቀደምት ነቢያት ዘመነ መዓት መምጣቱን ለማስታወቅ በፈረስ ተቀምጠው ዘገር ነጥቀው / ጦር አንስተው/ በከተማ ሲዘዋወሩ የሚታዩ ሲሆን ዘመነ ምሕረት መምጣቱን ለማሳየት ደግሞ በአህያ ላይ ተቀምጠው ይታዩ ነበር። ጌታችን መድኃኒታችን ኢየሱስ ክርስቶስም በሕዝበ እስራኤል የተለመደውን ሥርዓተ ነቢያትን በመጠቀም በሰውና በእግዚአብሔር ፣ በሰውና በመላእክት፣ በሥጋና በነፍስ፣ በተገዘሩት በሕዝበ እስራኤልና ባልተገዘሩት አሕዛብ መካከል የነበረው ጠብ ማብቃቱ ለመግለጥ እንዲሁም በነቢያት የተተነበየውን ሊፈጽም /ዘካ 9፥9/ በአህያና በውርጭላ ላይ በመሆን ወደ ኢየሩሳሌም ገባ። በአህያ ላይ ተቀምጦ ከደብረዘይት ተራራ አካባቢ ወደ ኢየሩሳሌም ሲገባ ደቀመዛሙርቱና ሕዝቡ ልብሳቸውን በማንጠፍ ሕፃናት ዘንባባ ዝንጣፊ በመያዝ ‹‹ሆሣዕና ለዳዊት ልጅ በጌታ ስም የሚመጣ የተባረከ ነው ሆሣዕና በአርያም›› እያሉ ክብሩን መድኃኒትነቱን ገልጠዋል /ማቴ 2፥9፣ መዝ 8፥2 ፣ ሉቃ 19፥38/።

ልብሳቸውንም ማንጠፋቸው፤ እንኳን አንተ የተቀመጥክባት አህያ እንኳን መሬት መርገጥ አይገባትም ሲሉ ልብሳቸውን አነጠፉለት። እነዚያ አይሁዳውያን ለተቀመጠባት አህያ ይህንን ያህል ክብር ከሰጡ፤ በድንግልና ፀንሳ ለወለደችው ለእመቤታችን ቅድስት ድንግል ማርያም ምን ያህል ክብር ልናድረግለት ይገባን ይሆን?

በዚህ ዕለት ፀበርት /ዘንባባ/ እየተባረከ ለሕዝብ ይታደላል ይኽንን በመያዝ ዕለቱ የፀበርት እሑድ ይባላል። አብርሃም ይስሐቅን ይስሐቅ ያዕቆብን በወለዱ ጊዜ፣ እስራኤል ዘሥጋ ከግብፅ በወጡ ጊዜ፣ ዮዲት ሊወራቸው የመጣውን ሆሊፎርኒስ የተባለ የአይሁድ ንጉሥ በገደለች ጊዜ ዘንባባ ቆርጠው አመስግነዋል።

ዘንባባ አንጥፈው ማመስገናቸው፤

√ ዘንባበ እሾኻም ነው የኃይል የድል ምልክት አለህ ሲሉ፤

√ አንድም ዘንባባ እሳት ለብልቦ ይተወዋል እንጂ አይበላውም አንተ ባሕሪህ አይመረመርም ሲሉ፤

√ አንድም ዘንባባ ረጅም /ልዑል/ ነው አንተም ባሕሪህ ልዑል ነው ሲሉ ዘንባባ አንጥፈው ተቀብለውታል።

ሆሣዕና በዕብራይስጡ ‹‹ሆሼዕናህ›› የሚል ሲሆን ‹‹እባክህ አሁን አድን›› ማለት ነው። መዝ 117(118)፥25-26

ኢየሱስ በሕዝቡ እልልታና ደስታ ታጅቦ ሲገባ ተጠንቅቀው ይታዘቡትና ይመለከቱት የነበሩ ፈሪሳውያን ደቀመዛሙርቱን ዝም እንዲያሰኛቸው ተናገሩት። እርሱም ሕዝቡ ዝም ቢል ድንጋዮች እንደሚጮኹ አስታወቃቸው። ኢየሱስም ኢየሩሳሌም በደረሰ ጊዜ ከተማዪቱን አይቶ አለቀሰላት እንዲህም አላት። “አንቺስ ብታውቂ ሰላሽ ዛሬ ነበረ ከእንግዲህ ውዲህ ግን ከዓይኖችሽ ተሰወረ … የይቅርታሽን ዘመን አላወቅሽምና” /ሉቃ 19፥41-44/። … ተጨማሪ ለማንበብ እዚህ ይጫኑ